قصه طويله عشان كذا بعتيكم كـــ فصول
الفصل الاول

قصة كفاح

يذكر احد الاخوه قصة كفاحه بعد ان عاش بالربع الخالي في بيئه بدويه .. ألقصه مليئة بالفكاهة والطرافة وكذلك الجد والمثابرة ... فيقول :
صحراء.. بيوت شعر 270 راس من الغنم ..34 راس من الأبل ..الله يشرفكم كلبين لزوم الحراسه .. وايت قديم لزوم تموين ألجماعه بالموهي .. الموقع الربع الخالي .. مجموعة غوائل بدويه جدا تنتمي إلى قبيلة عريقة من قبائل الجزائر.
ولدت في البدو وعشت وتربيت ..الغريب جدا أن أبوي الدكتاتوري القوي جدا وافق أني ادرس رغم إني اصغر إخواني الأربعة اللي يعتبر اكثر واحد فيهم خريج صف ثالث ابتدائي .
انا درست وماراح اقولكم المآسي والبلاوي اللي كنا نواجهها بس على شان نروح او نجي من المدرسه . فما بالكم بغيرها. على العموم خلصت الثانوي – علمي بتقدير امتياز وكانت النسبه97% . طبعا النتائج اخذناها من المدرسه بعد كل الناس ماخذوها اللي بالتليفون واللي وبالجرايد وغيرها . بالنسبه لنا مانعرف شي اسمه جرايد ولا نعترف بها . طبعا ممكن تقيسون على هذا باقي وسائل الأعلام مثل التلفزيون اللي كانت جدتي الله يرحمها اذا جابوا طار الناس اللي يجون من المدينه كانت تسميه النصراني .. الراديو أو "الرادي" مثل ماكنا نسميه كان الوحيد الموجود.
كان يشغله واحد من ألجماعه في الصبح على شان يسمعون الناس القرآن. واحد من اعمامي كان هو الوحيد اللي يشتغل في المدينه وكان يروح لشغله في الاماره وكان عنده سياره حوض وكل اسبوع اذا كان موجود ياخذ الشيبان ويروحون يصلون الجمعه وكان يمر على الاماره ويشيل كل الجرايد اللي هناك لأن اكثر الناس ماتاخذها ويجيبها ..طبعا ماهي ثقافه ولا زود علم لأنه اصلا مايعرف يقرأ .. كان جزء منها نفرشه سفره والجزء الباقي تاكله الغنم (تصدقون ..يعني غنمنا مثقفه اكثر منا)....نتيجة الثانوي كانت في بعض هالجرايد ومع ذلك مادرينا عنها . ذاك اليوم أني اخذت النتيجه وجيت اول واحد قابلته أبوي قلت له (يبه يبه ابشر نجحت باممتاز) عارفين وش قال لي قال:بركه افتكينا من هالدراسه ..يلا خلنا نروح نجيب (الفاجر) من عند فلان.. انتهى كلام أبوي... طبعا الفاجر هو اسم بعير كان الوالد يعزه كثير وبدون مبالغه كان يعزه ويعز بعض الحلال اكثر منا حنا عياله . عالعموم قلت له أبشر بس خليني اسلم على امي ودخلت وسلمت عليها وعلى اخواتي وبشرتهم .. قالت امي بسويلك براد شاهي (جائزة النجاح),الشاهي في ذلك الوقت كنا نعتبره شراب الأستقراطيين لأن وجوده كان نادر جدا وكانت القهوه العربيه هي المشروب الرسمي ..الأكل كان بسيط ثلاث هاو اربعه اشياء رئيسيه تدخل في عمل عدة اصناف ..الأشياء الرئيسيه هي:البر واللحم واللبن والتمر (الرز ماكان موجود بتاتا مو لأن حنا مانعرفه بس كنا مانحبه)..عالعموم رحت مع الوالد ورجعت بسرعه وطول الطريق رايح جاي ونا تفكيري في الشاهي(لاحظوا واحد مخلص الثانوي علمي وجايب ممتاز ويفكر بس في الشاهي ),رجعت خصلتا لوالده والبنات جهزوا الشاهي وسووا الخبز البر على الصاج..وقمنا نشرب من هالشاهي ونغمز من هالخبز ..طبعا شاهي الباديه دايم يسوونه على النار ويزودون السكر لأن الأكلات الحاليه عندهم قليله....وطبعا شاهي امي كان(عسل مره) من كثر السكر ..وذاك اليوم طبعا قضيت اكثر الوقت خارج البيت ماهو لأني ابغى اتمشى ولا فرحان بعد الامتحانات لا والله من المقص اللي ذبحني بعد الشاهي . بدت أجازة الصيف وماتتخيلون والله العظيم كل الهم كان بأمور الحلال والرعي والبحث عن أماكن جديده فيها مراعي وتزين للسكن ..قبل نهاية الأجازه بحوالي شهر ونص كان فيه عزيمه في بيت عمي ..وفي هالمناسبه حضروا ناس من جماعتنا الحضر وكان معهم مجموعه من عيالهم اللي هم اصلا كانوا زملائي في المدرسه. ذاك الليل كان هالشباب مالهم كلام الا التسجيل بعد الثانويه (وين سجلت؟ وين بتروح؟ وش ناوي عليه؟) يعني من هالقبيل ..وطبعا أخوكم اللي هو انا نايم في العسل ومشغول بحلال ابوه ومعني نفسي ذاك الليل بصب القهوه للضيوف.راحوا الدفعه الاولى يتعشون اللي هم الشيبان ومتوسطي السن وبقي الشباب. كانت فرصه إني اسولف انا والشباب اللي كانوا زملائي في المدرسه , وقاموا يشجعوني ويقولون معدلك عالي وكل الجامعات والكليات بتقبلك وحرام تضيع هالفرصه,وقالوا بعد ان التسجيل بدأ وأنهم راح يمشون بعد اسبوع مع بعض يسجلون, اللي في الرياض واللي في جد واللي في الشرقيه, والله انا بديت افكر لازم يعني لازم اكمل دراستي وايش يعني لو كملت؟؟ طيب وحلالنا وعيشتنا ..وابوي إخواني...امي ...اهلي جماعتي... وهاذا كله كوم ومفاتحة الوالد في الموضوع كوم ..ز هاذاي والله البلشه . فكرت في الموضوع وقلت ليش لا خلني اجرب يمكن يكون في مواصلة المدرسه خيره . وبعدين لو فشلت او ماعجبني الوضع برجع وماوراي احد بيقولي شي بالعكس الوالد ابرك ماعنده اذا رجعت ..هاذي خلصنا منها..زين الحين الوالد وشلون نوصله وهو اللي يالله خلاني ادرس جمبه في نفس المدينه مابالكم اذا قلت مدينه ثانيه..فكرت وشفت ان احسن شي إني اوصله عن طريق شخص غيري. رحت لعمي الموظف راعي الجرايد اللي قلت لكم عنه وقلت له الموضوع وكان اصغر من أبوي بس العلاقه بينهم قويه قلت له عالموضوع ..طبعا في البدايه حاول يقنعني ان الدراسه مافيها خير واحسن لك تجلس عند ابوك وتنفعه وتنفع حلاله وتعرس وترتاح!! واذكر انه قالي بالحرف الواحد(ياولدي وش تبي من هالدراسه تراها مانفعت اللي ضيعوا حياتهم في الطراد وراها !! وبعدين انت معك منها خير وش عاد تبي) كلام منطقي صح..ضغطت عليه وقلت له الوالد عنده خواني وفيهم خير وانا بس بطلع اجرب اذا مارتحت برجع, والوالد بعد قوي ويقدر على تصريف حياته بنفسه ..المهم قال لي خلاص بنشوف انا طبعا طلعت في راسي وقلت له التسجيل بيبدأ ولازم امشي الاسبوع الجاي واللي يجي متأخر مايسجلونه وبعدين ابي اروح مع زملائي , قلت له الليله بعد صلاة المغرب كلمه, وبصراحه وافق بس ببرووده ومن غير اقتناع. صلينا المغرب وكان اصعب مغرب في حياتي لدرجة إني الا إلى الحين صليته ,ركعتين ولا ثلاث ,من الخوف ماهو من الوالد انه مايوافق ,الخوف من انه يتوطا بطني !! وانتوا ماتعرفون أبوي فنان مره في هالحركات. بعد الصلاة جبت القهوه وصبيتها والعم كان ناسي بس يوم شافني اصب القهوه تذكر واخذ الوالد على جنب وقاله الموضوع وماادري العم كان معي ولا علي. نادوني معهم وهنا بدت العظام ترقل ,قال أبوي وش هالكلام وش تبي بالدراسه وحلالنا (لاحظوا الحلال دايم يجي في المرتبه الاولى, يعني اتوقع لو خروف من الحلال بيطلب من أبوي يسفره لامريكا يدرس بيسويها لأنه يعزه مره؟!!) ماعرفت وش اقول ..لاكن استجمعت كل القوى اللي عندي وقلت كل شباب الجامعه بيروحون يدرسون بره(مدن ثانيه) ..قال لي من العيال؟ قلت عيال جامعتنا اللي بالمدينه ..قال لي طيب كم بتجل سووين بتروح؟ قلت مادري تعتمد عالمكان اللي بسجل فيه . يوم شاف إني مصمم اسمعوا, وش قال: ...............